Орысбай Әбділдаұлы батасы

Орысбай Әбділдаұлы батасы

Ел көңілі шалқысын,
Күн нұрына балқысын.
Перзенттері тік тұрып,
Қызмет етсін халқы үшін.

Қара жерге шаншылып,
Орман болсын талшыбық.
Егін — жайлар жайқалсын,
Ақжауынға малшынып.

Безінгендер боздасын,
Қой егізден қоздасын.
Жұмыр басты пенделер,
Ойламасын өз басын.

Бұзау үзіп бұйдасын,
Сиыр уыз сыйласын.
Көже құйып көршілер,
Бірін — бірі қинасын.

Қыл қүйрықты өсіріп,
Құлын шапсын көсіліп.
Жылқышылар құрық caп,
Шаттансын бір төс ұрып.

Отар көшін бастаған,
Ай мүйізбен жасқаған,
Ақ серкелер көбейсін,
Етке өткізіп тастаған.

Көк қауласын дүркіреп,
Жауын жаусын сіркіреп.
Жаңа дүние жаңғырсын,
Ой — сананы сілкілеп!
Әумин!

***
Жай қолыңды құрдасым,
Ғұмыр кешкін бір ғасыр.
Сипалап өт өмірден,
Қосағыңның сырғасын.

Ағайын — жұрт азбасын,
Ойламасын өз басын.
Бабалардан ұласқан,
Жөн — жоралғы тозбасын.

Берік болсын, бел, мықын,
Қорғаштай біл ел құтын.
Есті болса ер жігіт,
Халық аман, жер бүтін.

Тасып кетпей меймана,
Нәпсіңді тый, ей, бала!
Қалтылдаған қарттар мен
Артында бар кейуана.

Арулар көп үмітті,
Ардақ тутқан жігітті.
Арқа сүйер әрқашан,
Азаматқа білікті.
Өмір гүлі әр үйдің,
Қорғаны бол сәбидің.
Құдіретіңді хош көріп
Сонда ғана танимын.
Қайырым жаса жарлыға.
Жомарттық тән арлыға.
Айтып — айтпай не керек,
Жарық күнде қалғыма!
Әумин!

***
Жер қайыссын жылқысы,
Тыныш болсын ұйқысы.
Қоздап жатсын қойлары,
Тарқамасын тойлары.

Боталасын түйесі,
Қорғап жүрсін киесі.
Егіз тапсын ешкісі,
Ренжітпесін еш кісі.

Сайға сыймай сиыры,
Малға толсын қиыры.
Озып келсін қосқаны,
Алқаласын достары.

Ұзын болсын құрығы,
Ұзатпайтын ұрыны.
Ойына алған тілегі,
Орындалсын үнемі.

Құт — береке дарысын,
Уыздығы жарысын.
Жарқырасын Ай — Күні,
Асып тұрсын айбыны.

Өсіп — өнсін ұрпағы,
Шуақ шашсын нұр таңы.
Аулақ болсын, уайым,
Сақтап жүрсін Құдайым!
Әумин!

***
Балаларға бақ қонсын,
Періштелер жақ болсын!
Кілең бестік сыйлансын,
Имандылыққа илансын!

Биікте қалықтасын,
Оқудан жалықпасын!
Ауырып — сырқамасын,
Үлестен құр қалмасын!

Өнерге құштар болсын,
Талантын ұштар болсын!
Кітапқа құмар болсын,
Халқына ұнар болсын!

Өмірде сыйлас болсын,
Өкпеге қимас болсын!
Құдайым қуат берсін
Көңілге шуақ берсін!

Қаламы жорғаласын,
Бестікті дорбаласын!
Күндей боп күлімдесін,
Сындардан сүрінбесін!

Мұраттас болсын — дағы,
Жарқырап жансын бағы!
Құлашын кеңсермесін,
Бос жүріп теңселмесін!

Алысқа көзін тіксін,
Ақ бата сөзімді ұқсын!
Мақсаты зордан болсын,
Еліне қорған болсын!

Ақ сүтті ақтар болсын,
Отанға мақтан болсын!
Ұстазын ұлықтасын,
Осыны ұмытпасын!
Әумин!


Бата тілектер жинағы Орысбай Әбділдаұлы

© Бата-тілектер дереккөзі

Тілек сізге ұнаса, достарыңызға бөлісіңіз?
Тілек құттықтау